Юлда йөрсәң бул сизгер, юл кагыйдәсен яхшы бел!

Авыл җирлегендә яшәсәк тә юл кагыйдәләрен яхшы белү бик кирәк. Шуңа күрә, балалар уртанчылар төркеменнән үк юл кагыйдәләрен өйрәнә башлыйлар: зур юлларда үз-үзеңне ничек тотарга, юл аркылы ничек чыгарга, машинага утырып йөргәндә үзеңне тоту кагыйдәләре, юл билгеләре ни аңлата..... Дәресләр уен формасында төрләндереп алып барабыз, максатчан экскурсияләр, очрашулар, төрле ярышлар  - болар безнең эш формалары. Бүген безнең бакчага очрашуга өлкән участковый Сабиров Фәнил Фаритович, ПДН инспекторы Муртазина Гүзәлия Котдусовна һәм Мухаметзянова Илүзә Илнуровна килделәр. Алар балалар белән әңгәмә кордылар, белемнәрен тикшерделәр. Юлда гына түгел, җәмәгать урыннарында, су буйларында үз-үзеңне тоту кагыйдәләренә, янгын куркынычсызлыгына кагылышлы сорауларга да тукталдылар.  Безнең балаларыбыз да югалып кала торган түгелләр, үзләренең белгәннәрен әйтеп бирделәр. Фәнил абыйларына тәртипле булырга, хаттә кайберләре  әти-әниләренә юл кагыйдәләрен бозарга юл куймаячакларын да (кайвакыт алай да булып куя икән шул) әйтеп сүз бирделәр.

Шундый эчтәлекле, истә кала торган очрашуга килгәнегез өчен рәхмәт сезгә, хөрмәтле инспекторлар!  Сезгә уңышлар телибез! Тагын үзебездә кунакта көтеп калабыз.