Кыш айлары балаларга уеннар уйнап, чыныгып үсәргә яхшы мөмкинлек бирә. Кышкы уеннар балаларның физик һәм акыл сәламәтлеген саклау, сәламәт яшәү рәвешенә омтылыш тәрбияләү, спорт белән шөгыльләнергә кызыксынучанлыкларын арттыру, сабырлык, кыюлык сыйфатлары тәрбияләү, уеннар барышында команда рухын формалаштыру, башкаларга карата ягымлы мөгаләмә булдыру, ярдәмләшү теләге тудыру максатларын үтәргә ярдәм итә.   

Шуларны истә тотып, бакчабызда “Кышкы күңел ачулар” темасына тематик атналык булып узды. Атналык барышында балалар кышкы спорт төрләре белән танышуны дәвам иттеләр, дидактик уеннар уйналды. Йомгаклау чарасы буларак, уртанчылар төркеме балалары белән саф һавада кызыклы, кышкы уеннар уйналды. Балалар “Кыю хоккейчылар”, “Төз атучы”, “Дустынны тундырма белән сыйла”, “Кар йомарламы” кебек эстафеталарда кыюлыкларын, җитезлекләрен күрсәттеләр. Әлеге чара балаларга бик ошады.