8 нче апрельдә Комыргуҗа урта мәктәбендә Ш.Мәрҗани исемендәге фәнни-гамәли конференция уздырылды. Конференцияне Татарстан Республикасы Фәннәр академиясенең Ш.Мәрҗани исемендәге тарих институты, район мәгариф бүлеге, Комыргуҗа урта мәктәбе һәм Шиһабетдин Мәрҗани музее оештырды. Конференция эшендә Саба, Арча, Лаеш, Балтач, Кукмара, Теләче районнарыннан, Марий Эл Республикасыннан, шулай  ук  Г.Тукай исемендәге авыл хуҗалыгы техникумыннан делегатлар катнашты. Кунаклар арасында язучы, драматург, җәмәгать эшлеклесе, Гаяз Исхакый, Габдулла Тукай исемендәге премияләр лауреаты Рабит Батулла, Татарстан Фәннәр академиясенең Ш.Мәрҗани исемендәге тарих институты "Яхья Абдуллин исемендәге иҗтимагый фикер һәм диннәр тарихы" бүлеге өлкән хезмәткәре, тарих фәннәре кандидаты Рамил Әдһәмов,  якташыбыз, тарих фәннәре кандидаты Тәэминә Биктимерова, "Мәгариф" журналының бүлек мөхәррире Таһир Сабирҗанов, Г. Ибраһимов исемендәге тел, әдәбият һәм сәнгать институтының гомуми лингвистика бүлеге өлкән фәнни хезмәткәре, филология фәннәре кандидаты, доцент Рифат Мирхаев һәм башкалар катнашты.