30 нчы октябрь көнне бай һәм матур тарихы булган мәктәбебез үзенең 55 еллык юбилеен билгеләп үтте. Бәйрәм тантанасына мәктәбебезне төрле елларда тәмамлаган укучылар, укытучылар һәм исемнәре, хезмәт юллары  Лесхоз мәктәбе белән бәйле булган кадерле  кунаклар җыелды. 1960 нчы елда, сигезьеллык мәктәп буларак, үзенең ишекләрен ачкан мәктәп бу көнне үзенең үткәненә кире әйләнеп кайтты. Ачылган көннән алып бүгенгесенә кадәр булган вакыйгаларны , мәктәп тормышына үзләреннән зур өлеш керткән шәхесләрне барлады . Бәйрәмчә бизәлгән зал сәхнәсенә төрле елларда мәктәбебездә хезмәт куйган укытучылар, укучылар , кунаклар күтәрелделәр һәм үзләренең  истәлекләре белән уртаклаштылар.  Арча районы башкарма комитеты  җитәкчесе урынбасары Гарифҗанов Р.И., Мәгариф идарәсе җитәкчәсе Дәүләтбаев З.М. мәктәп коллективы эшчәнлегенә югары бәя бирделәр. Мосунов А.М, Ибрагимов А.Р., Хайруллин Ш.М. мәктәп  тормышы белән бәйле истәлекләре белән уртаклаштылар, коллективка  матур теләкләрен җиткерделәр. Бәйрәм кичәсе  җырлы-биюле концерт номерлары белән үрелеп барды, чәй өстәле янында матур әңгәмәләр корылды. Мондый очрашулар дәвамлы булсын, алга таба да укучылар һәм укытучыларның ирешкән уңышлары белән горурланырлык булсын иде!