Бүген мәктәбебезгә зур кунаклар- Арча районының “Казан арты” тарих-этнография музее хезмәткәрләре килде. Алар , Әдәбият елы уңаеннан, мәктәбебез фойесында  бик бай эчтәлекле  музей экспонатларыннан саналган китаплардан күргәзмә оештырдылар. Музейның әдәбият һәм сәнгать бүлеге мөдире Гарипов Шәфигулла Зәйнуллович укучыларга  якташ  язучыларыбыз турында бик үтемле итеп сөйләде, аларның  иҗатлары белән таныштырды.  Яңа  гына басылып  чыккан китаплар турында мәгълүматлар бирде. Музей мөдире Ленар Гобәйдуллин гарәп телендә  язылган  бик борынгы  китап үрнәкләре  турында , аларның язылу тарихы турында сөйләде. Укучылар белән  әдәбиятка кагылышлы җанлы  әңгәмә үткәрде. Җырчы кыз Алисәнең  Арча турындагы җыры ,  “Су буенда учак  яна”   җыры   тыңлаучыларның  күңелен  тагын да күтәреп җибәрде. Очрашуның ахырында укучылар  күргәзмәдәге  китапларны  карадылар, үзләренә ошаганнарын алып  укыдылар.  Шушындый бай эчтәлекле әдәби  мәйдан оештырганнары өчен музей хезмәткәрләренә  зур рәхмәтебезне белдерәбез.