Бүген – бөек шагыйребез Габдулла Тукайның тууына 138 ел! Габдулла Тукай - татар шигъриятенең иң якты йолдызы. Гомере 27 яше дә тулмыйча өзелгән яраткан шагыйребез безгә бәяләп бетермәслек әдәби мирас бүләк итеп калдырган. Аның кыска гына иҗат юлы дәвамында язып калдырган шигырьләре бүгенге көндә дә бик актуаль. Халкыбызның сөекле улы калдырган иҗат мирасы һәм рухи яктылык - безнең горурлыгыбыз. Шагыйрь һәр татар күңелендә яшәсә, милләтебезнең киләчәге дә өметле булачак!  Мәктәбебездә “Тукай минем йөрәгемдә” дип исемләнгән әдәби-музыкаль кичә үтте. Укучылар иҗат юлын барлап шигырьләр сөйләделәр, әкиятләрен сәхнәләштерделәр. Тормыш юлы һәм иҗаты буенча төшерелгән фильмнан өзек карадылар, дәрес гимнга әверелгән “Туган тел” җыры белән тәмамланды". Туган телебезне саклыйк, яратыйк, үзебездән соңгы буыннарга тапшырыйк!