22 март көнне мәктәптә “Нәүрүз” бәйрәме үтте. Бәйрәмнең хуҗасы Нәүрүзбикә Кыш бабай белән көч сынашты: кашыкка йомырка салып йөгерде, көчләрен үзара аркан тартып сынады, дәртле татар халык биюен биеде. Әлбәттә инде яшь, чибәр Нәүрүз кызы Кыш бабайны бу ярышларда җиңеп чыкты. Кыш бабай матур теләкләрен теләп китеп барды. Ә укучылар бәйрәмне күңелле ярыш-уеннар белән дәвам иттеләр. "Һәр бәйрәмнең үз тәртибе, гореф- гадәтләре, кыйммәте бар. Татар халкының милли йолаларын кечкенәдән үк балаларга аңлатсак, бергәләп үткәрсәк, буыннар арасында дәвамлылык, миллилек хисе югалмас. Алар, һичшиксез, үз телләрен, рухи байлыкларын саклаучылар булып үсәр дип ышанам", - дип фикерләре белән уртаклашты татар теле һәм әдәбияты укытучысы Ләйлә Гыйлмулла кызы Дәүләтъярова.