Арча район хакимиятендә безнең мәктәп укучыларының фәнни-тикшерү эшләре буенча җәмәгать тыңлаулары узды. Анда район башкарма комитеты җитәкчесе урынбасарлары Илшат Галимуллин, Эльвира Вафина катнашты. Җәмәгать тыңлауларына укучыларыбыз әзерләгән Арча районы территориясендә Казансу елгасы һәм аның кушлыдыкларын өйрәнү буенча фәнни-гамәли эшләр чыгарылды. Тугызынчы сыйныф укучысы  Хафизова Зөләйха Ия елгасы агымына диффуз пычрануның йогынтысы турында чыгыш ясады. Ия – Казансу елгасының уң як кушлыдыгы. Зөләйха Бөтенроссия бәйгесенең Татарстан буенча төбәк этабында җиңү яулаган. Хәзер ул Бөтенроссия этабында Арча районы буенча эшләгән фәнни эше белән Татарстан данын яклап катнашачак. Тугызынчы сыйныф укучысы  Әхмәтов Камил “Чәчүлектә туфракның сулыш алу күрсәткечләре” дигән темага чыгыш ясады. Ул Үрнәк җирлегендә төрле культуралар чәчелгән һәм парга калдырылган басуларда туфракның сулыш алу күрсәткечләрен өйрәнгән. Унынчы сыйныф укучысы  Якупов Марсель, унберенче сыйныф укучысы Зиатдинов Әлфис агымны көйлүче чаралардан соң Казансу елгасында төрле матдәләр күрсәткечләре буенча чыгыш ясады. Фәнни-тикшерү эше барышында ул соңгы биш елдагы үзгәрешләрне күрсәтте. Һәр чыгыш фикер алышулар белән үрелеп барды. Чыгыш ясаучы укучылар җәмәгать тыңлауларында катнашучыларның сорауларына тулы җаваплар бирделәр. Файдалы киңәшләр, тәкъдимнәр дә яңгырады. Ахырдан район башкарма комитеты җитәкчесе урынбасары Эльвира Вафина эчтәлекле чыгыш ясаган укучыларга рәхмәт әйтте, киләчәктә яңа уңышлар теләде.