Хәтерләүдән курыкма син -үткәнеңне онытма син! дигән әйтем бар. Телебез, мәдәниятебез  саклансын өчен, безгә туган ягыбызның тарихи үткәнен, бүгенгесен белү кирәк. Быел Туган телләр елы кысаларында, без Арча төбәгенең үткәненә күз салабыз, аның  данлыклы шәхесләрен барлыйбыз. Без 21 май көнне күренекле татар мәгърифәтчесе, галим  якташыбыз  Габденнасыйр Курсавины искә алырга, аның  туган авылы  Корсага бардык. Габденнасыйр Ибраһим улы Курсави 1776 елда Арча районы Курса авылында мулла гаиләсендә туа. Малмыж өязендәге Мәчкәрә мәдрәсәсен тәмамлаганнан соң, укуын Бохарада дәвам иттерә. Анда өлгер шәкерт булып таныла. Курсави үзеннән соң гарәп телендә язылган уннан артык хезмәт калдыра. Без Урта Курса авылы мәктәбендәге музейда булдык, Курсави укыткан мәдрәсә бинасы белән таныштык, бик матур мәчеткә кердек. Без бу сәяхәттән бик канәгать калдык.