15 апрель – Габдулла Тукайны искә алу көне. 1913 елда бу көнне (иске стиль буенча 2 апрельдә) бөек татар шагыйренең йөрәге тибүдән туктый. Вафатына инде 108 ел узганнан соң Тукайның тормышын һәм иҗатын архивларда сакланучы ядкәрләр күзалларга ярдәм итә. Г.Тукайның тормышын, иҗатын өйрәнү, тууына 135 ел тулу уңаеннан Апайкина-Гарь мәктәбендә “Без – Тукай шәкертләре” дигән әдәби- музыкаль кичә үткәрелде. Укучылар презентация ярдәмендә аның тормыш юлын кабат искә төшерделәр, яңа мәгълүматлар тупладылар,  тәэсирләре белән уртаклаштылар.  Кичәнең икенче өлешендә узләре дә Г.Тукайның әсәрләрен белүләрен, аның шәкертләре булуларын  исбатлап күрсәттеләр. Укучылар  табышмак-сорауларга дөрес җаваплар таптылар, җырларын җырладылар, шигырьләрен сәхнәләштереп күрсәттеләр. Тукаебызның шигырьләре, әкиятләрен уку, яраткан җырларын җырлау аша укучылар тормыш сабагы ала. Алар укучыларда  изге туган телебезгә, газиз татар теленә мәхәббәт тәрбияли.