Арча районы милләтебезнең рухи, мәдәни үзәкләренең берсе. Ул  үзенең искиткеч гүзәл табигате, төзек, мәһабәт йортлары, милли үзаңлы, һөнәрле , тырыш ,гореф-гадәтләрне саклап яшәүче халкы булуы белән күп яклардан аерылып тора Борынгы бабаларыбыздан мирас булып калган байлыкны- гореф-гадәтләребезне, милли йолаларыбызны бүгенге көнгә кадәр саклап яшәү - Арча төбәге кешеләренең милли тәрбиялелеген күрсәтә. ”Үткәнне өйрәнми торып, бүгенгене белеп булмый” диләр бит. Борынгы бабаларыбызның яшәү шартлары, халкыбызның бәйрәм һәм көнкүреш йолаларын өйрәнү , аны саклап, буыннан-буынга җиткерү – безнең изге бурычыбыз.Шуны истә тотып, район күләмендә игълан ителгән китап чыгару проектына кушылып, без “Арча төбәгендә сакланып калган гореф-гадәтләр” исемле китап эшләдек. Бу китапта милли гореф-гадәтләр, Арча төбәгендә зурлап уздырыла торган йола бәйрәмнәре турында  күп мәгълүмат тупланды.