Апрель - үзенең туган телен, мәдәниятын яраткан һәр кеше өчен үзенчәлекле ай. Чөнки апрель аенда милләтебезнең йөзек кашы булган олуг шәхесебезне -  Г.Тукайны искә алабыз, аның иҗатын барлыйбыз. Быел Г Тукайның тууына 134 ел тулу уңайдан, 14 нче апрель көнне “Без Тукайны укыйбыз” исемле әдәби марафон старт алды. Мәктәпләрдә укулар булмаса да, Тукай рухы йортларга күчте. Бу көннәрдә әдәби марафонда катнашырга теләгән һәркем кулына Тукай китабын ала  һәм үзенә ошаган  теләсә кайсы битен ачып укып яки яттан сөйләп күрсәтә. Бу чарада без дә  актив катнашабыз  һәм шул рәвешле туган телебезгә һәм бөек Тукаебызга үзебезнең хөрмәт хисебезне белдерәбез.   Әдәби марафон 26 нчы апрельгә кадәр дәвам итәчәк. Әле тагын бик күпләребез бу марафонда актив катнаша алачак.