Арча муниципаль районы мәгариф идарәсе планы нигезендә, 26 нчы апрель –бөек шагыйребез Габдулла Тукай туган көне уңаеннан , “Г. Курсави исемендәге күппрофильле лицее» базасында «Тукай- шигъри чишмәбез» шигырь укучылар бәйгесе уздырылды, Тукай шигырьләре яңгырады, җырлары башкарылды.
Габдулла Тукай – татарның яңарышын тудырган бөек шәхес. Ул безнең халыкның иң мәшhүр, иң газиз, иң популяр милли шагыйре. Кыя тау никадәр биек булса, аның зурлыгын, мәhабәт матурлыгын тулырак күрү өчен шулкадәр читкәрәк, ераккарак китеп карарга кирәк була. Тукай – рухи тормышыбыз, мәдәни дөньябызның әнә шундый биек тау башы.
Бәйгене мәгариф идарәсенең милли мәсьәләләр буенча методисты Мостафина Энҗе Габдуллаҗан кызы сәламләү сүзе белән ачып җибәрде. Бәйгедә район мәктәбе укучылары, укытучылар катнашты.
Бәйгенең максаты: укучыларда Габдулла Тукай шигырьләренә тирән хөрмәт уяту; татар халкының мәдәнияте , шагыйрь иҗаты белән кызыксындыру; укучыларны иҗатка тарту .
Укучыларның чыгышларын мәртәбәле жюри әгъзалары - Арча районы “Әлифба” музее хезмәткәре Таҗиев Дамир Гыйлемшәех улы , “Каурый каләм” иҗат берләшмәсе җитәкчесе Адилә Әхмәтҗанова бәяләде . Бер укучының да чыгышы игътибарсыз калмады. Укучыларга район мәгариф идарәсенең истәлекле бүләкләре тапшырылды.