Бүген Арча үзәк китапханәсе каршында эшләп килүче “Каурый каләм” әдәби-иҗат берләшмәсе вәкилләре Г.Курсави исемендәге күппрофильле лицей укучылары белән очраштылар. Ошрашуга берләшмә җитәкчесе шагыйрә,  ветеран укытучы Халидә Габделхак кызы Фәйзрахманова, Урта Бирәзә авылында яшәп иҗат итүче Дамир Фәтхрахман улы Нуриәхмәтов, Арча районы Кәче мәктәбенең физик тәрбия укытучысы Хәйдәр Хәйрулла улы Зәйнуллиннар килде.
Халидә Габделхак кызы үзенең балалар өчен иҗат иткән шигырьләрен укыды, укучыларыбызга киңәшләр бирде.
Дамир Фәтхрахман улы Нуриәхмәтов үзенең табышмак-шигырьләрен укып, укучыларны җанландырып кына калмыйча, дулкынланырга, уйланырга мәҗбүр итте.     
Арча хәбәрләре редакциясе белән һәрдаим тыгыз элемтәдә торып, иҗат җимешләре белән бүлешүче якташыбыз Хәйдәр Зәйнуллин балаларны үзенең  "К" хәрефеннән генә торган "Кәрим коесы" дигән китабыннан кызык, мавыктыргыч өзекләр укып, укучыларны таң калдырды. Гаҗәп тә, серле дә булып күренгән “Кәрим коесы” исемле китап күпләрне кызыксындырды. “Сезнең арада талантлы укучылар бар икән, шигырь языгыз, китап укыгыз, күңел байлыгыгызны, телебезнең матурлыгын, сафлыгын арттырыгыз. Киләчәктә кайберләрегез шагыйрьләр сафында булыр дип өметләнәбез”, - диделәр алар укучыларга. Очрашудан һәркем канәгать калды.