23 нче март көнне Курса-Почмак мәктәбе спорт залында 2003-2005 нче елгы егетләр арасында “Ак Барс Агро” ширкәте җитәкчесе Саляхов Шайдулла Имам улы көрәш ярышлары уздырды. Бу ярышлар Актанышта Татарстанның беренче президенты Кубогына узачак республика ярышларына сайлап алу туры буларак үтте. 65 егет 10 үлчәү категориясенә бүленеп ярыштылар.

Җиңүчеләр медаль, грамота һәм акчалата бүләккә ия булдылар. Болардан кала, Шайдулла Имамович тарафыннан абсолют батырга 2 тәкә куелган иде. Аның берсе 50 кг га кадәр үлчәү авырлындагы егетләр арасында уйнатылса, икенчесе өчен 55 кг һәм аннан югарырак үлчәү авырлыгындагы җиңүче егетләр бил алышты. Җиңел үлчәүдә абсолют батыр булып Курса-Почмак мәктәбеннән Рамазанов Зөлфәт танылса, авыр үлчәүдә Арчаның 6 нчы номерлы мәктәбеннән Муратов Динияр җиңү яулады. Барлык катнашучылар бушлай кайнар ризык белән тукландылар.
Барлык көрәшчеләр һәм тренерлар исеменнән ярышларның иганәчесе Саляхов Шайдулла Имам улына, оештыручы Курса-Почмак мәктәбе директорына һәм коллективына олы рәхмәтләребезне белдерәбез.