2 нче февраль көнне Иске Кырлай мәктәбендә Фәнил Гарафиев истәлегенә 8 нче тапкыр традицион чаңгы ярышлары уздырылды. Ярышларда барлыгы 15 мәктәптән һәм Арча педагогия көллиятеннән 111 укучы катнашты. Ярышны ачу тантанасында Иске Кырлай авыл җирлеге башлыгы Сираҗетдинов Фәргать Гарәфетдин улы, иганәчеләр Габделгазизов Инсаф Нурсил улы һәм Гарафиев Фәнис Фәнил улы катнаштылар. Укучылар 4 төрле яшь категориясенә бүленеп ярыштылар.

Урта мәктәпләр арасында 1 нче урынга Ашытбаш мәктәбе күтәрелде, 2 нче һәм 3 нче урыннарны Арчаның 6 нчы номерлы мәктәбе һәм Курса Почмак мәктәпләре бүлештеләр.
Төп гомумбелем бирү мәктәпләре арасында 1 нче урынны хуҗалар – Иске Кырлай мәктәбе командасы яулады. 2 нче урында – Урта Курса мәктәбе, 3нче урында Хәсәншәех мәктәбе командалары.
Барлык катнашучылар да бушлай кайнар ризык белән тукландылар, ә җиңүчеләр медаль һәм грамоталар белән бүләкләнделәр. Җиңгән командаларга кубок һәм дипломнар тапшырылды. Ярышның иганәчесе – Арча районы “Металл” ширкәте (җитәкчеләре Гараева Л.Г. һәм Габделгазизов И.Н.). Җиңүчеләрне Габделгазизов И.Н. һәм Арча районы мәгариф бүлеге җитәкчесе Мухамадияров Р.Д. котлады.