Балаларны тәрбияләү процессы -  гаять  әһәмиятле һәм катлаулы, каршылыклы процесс. Шул вакытта иң кирәкле һәм нәтиҗәле ысул -  хезмәт тәрбиясе. Балаларны көченнән килгән хезмәткә тарту, ул хезмәт белән кызыксындыру, ул хезмәтне башкару өчен кирәкле булган эш кораллары белән таныштыру һәм хезмәтнең нәтиҗәсен күрә белергә өйрәтү, хезмәт кешеләренә хөрмәт хисе тәрбияләү - безнең бурычыбыз.Безнең балалар бакчасында  балаларны хезмәт тәрбиясе ярдәмендә тәрбияләү өчен барлык шартлар да тудырылган. Балалар бик теләп бүлмә гөлләре үстерергә, аларны тәрбияләргә өйрәнәләр. Бакчабызны чиста - пөхтә һәм тәртиптә тоту өчен дә көчләреннән килгәнчә булышалар, үзләре яратып уйнаган уенчыкларны, уенчык киемнәрен юарга булышалар. Көндезге йокыдан соң, үзләре йоклаган урын - җирләрне тәртипкә китереп куялар, кечкенәләр төркеме балаларына булышалар, үз - үзләренә хезмәт күрсәтергә өйрәнәләр. Бала хезмәтне никадәр теләп башкарса, аның нәтиҗәсе дә шулкадәр яхшырак була.