Мәктәп белән янәшә булу һәм аның белән тыгыз элемтәдә тору -  балаларның аң - белем дәрәҗәсен үстерү, тәрбия бирүгә гаять зур йогынты ясый. Балалар бакчасындагы якын дусларын, ияләнгән һәм яраткан тәрбияче апаларын калдырып, моңа кадәр күрмәгән, белмәгән мәктәпкә  укырга бару -  бала психологиясе өчен кискен һәм зур борылыш бит ул. Шуңа күрә, бала мәктәп төшенчәсен аңлап, анда ни өчен барганнарын, нәрсәләр эшләгәннәрен белеп ,күреп, танышып торырга тиеш.Без,  Яңа Кырлай балалар бакчасы коллективы, мөмкинлектән файдаланып, мәктәп тормышы белән танышып, кирәк икән үзебез дә төрле тәрбия чараларында катнашып торабыз. Безнең күршебездәге класс бүлмәсендә Шамил Садыйкович укучыларга самолет модельләре ясарга өйрәтә, без дә аларны кызыксынып күзәттек.