Уен - бала тормышының иң әһәмиятле мизгеле. Уен вакытында балаларның хәрәкәт активлыгы, тою - сиземләү сәләте, күзаллаулары, яшьтәшләре белән аралашу, аңлашу осталыклары үстерелә. Ирекле уеннар ярдәмендә бала бергәләшеп уйнарга, уенчыклардан уртак файдалана, алыштырып уйный  белергә күнегә, бер - берсен хөрмәт итә белергә өйрәнә.Уен уйный белү баланың киләчәк тормышына уңай йогынты ясый.Шуңа күрә, без, тәрбиячеләр, уйнаганда балага дөрес юнәлеш бирә белергә тиеш.Уен вакытында да, тормыштагы кебек үк проблемалар, төрле хәлләр килеп чыгарга мөмкин. Бала  уенда югалып, куркып калмыйча  ситуациядән чыга, аны чишә ала икән, димәк, ул киләчәктә дә төрле каршылыклар алдында каушап калмаячак.Уен вакытында баланың характеры да формалаша. Шуны исәпкә алып,без балалар белән мөстәкыйль уеннарны ешрак уйнарга тырышабыз.