Укучыларда эстетик тәрбия формалаштыру, гүзәллеккә, матурлыкка  омтылыш хисе уяту максатыннан Халыкара хатын-кызлар көне уңае белән мәктәптә “Озын толым” бәйгесе оештырылды. 5-8 нче сыйныфта белем алучы озын чәчле кызлардан ике команда тупланып, алар төрле өлкәдәге белем-күнекмәләрдә көч сынаштылар. Бәйге барышында кызлар үз исемнәренең мәгънәләрен аңлаттылар, бишек җыры башкардылар, татар халык мәкальләрен искә төшерделәр, халкыбызның милли ашларын барладылар, ризык пешерү серләрен ачтылар, тапкырлыкта ярыштылар. Укучы кызлар иҗади яктан да сәләтләрен күрсәттеләр, читек белән түбәтәй рәсеменә милли бизәкләр ябыштырдылар, башлангыч сыйныфта укучы кызларга причёска ясап, аны якладылар.

  Соңыннан һәр команда укытучы апаларын, техник хезмәткәрләрне, укучы кыз балаларны матур итеп бәйрәм белән котладылар. Чара тамашачылар күңеленә хуш килде, моны аларның көчле алкышларыннан тоярга мөмкин иде.