1 нче март көнне мәктәптә район мәгариф хезмәткәрләре профсоюз оешмасының Түбән Аты төп гомуми белем мәктәбе башлангыч бүлекчәсе хезмәткәрләре катнашында җыелыш үтте. Анда укытучылар, техник хезмәткәрләр, балалар бакчалары тәрбиячеләре катнашты.

    Коллективтагы атмосфера, хезмәткәрләргә тудырылган уңай эш шартлары, алга таба башкарыласы эшләр турында кереш сүз белән мәктәп директоры Шакиров Р.Н. җыелышны ачып җибәрде. Көн тәртибенә куелган төп мәсьәләләрнең берсе – Түбән Аты төп гомуми белем мәктәбе җитәкчелеге һәм башлангыч профсоюз оешмасы арасында 2021 – 2023 нче елларга төзелгән “Коллектив килешү”гә үзгәрешләр, өстәмәләр кертү.     Профсоюз рәисе Маликова Г.Г. авыру аркасында җыелышта катнаша алмау сәбәпле, башкарылган эшләр һәм алда торган бурычлар турында профком әгъзасыХәмидуллин Д.М. чыгыш ясады. Фикер алышуларда Түбән Аты балалар  бакчасы мөдире Хөсәенова Х.М., Урта Сәрдә башлангыч мәктәбе укытучысы Вәлиуллина Р.Р. чыгышлары тыңланды. Төп мәсьәләгә килсәк, төп өстәмәләр һәм үзгәрешләр “Коллектив килешү”нең 3 нче (“Хезмәт килешүен төзегәндә һәм аны өзгәндә гарантияләр”,8 нче (“Хезмәтне һәм сәламәтлекне саклау”) бүлекләренә карый. Үзгәрешләр бертавыштан хупланды, кабул ителде. Түбән Аты төп гомуми белем мәктәбе коллективы башлангыч профсоюз оешмасы җыелышында Мәгариф идарәсеннән методист Әхмәдиева Альбина Шамил кызы катнашты.