6 нчы апрельдән мәктәбебездә укулар өйдән торып башланып китте. Укучыларыбыз барлык дәресләрне уку планнары һәм расписание нигезендә дистанцияле укый башлады. Укытучылар белем бирү процессын төрле платформаларда алып баралар. Иң башта кайсы гаиләдә нинди электрон җиһаз (компьютер, планшет, ноутбук, смартфон) барын белештек. Күпчелек укытучылар он-лайн укуны ZOOM рәсми сайты буенча алып бару фикеренә килделәр.

   Әти-әниләрнең дә балаларга, бигрәк тә башлангыч чорда, ярдәме һәм күзәтчелеге кирәклеге аңлашыла. Әлеге төр укытуның дәвамлылыгы илебездәге вазгыятьнең ни дәрәҗәдә күпмегә сузылачагына бәйле булачагын әти-әниләргә, балаларга аңлату эшләре бара. Укучыларга карантин чорында үз-үзеңне дөрес тоту кагыйдәләре дә даими исләренә төшереп торыла. Билгеләнгән кагыйдәләрне үтәсәк, өйдә торсак, бу ситуациядән тизрәк чыгарбыз.

   Дәресләр он-лайн һәм оффлайн формаларында оештырыла, 30 минут дәвам итә. Һәр дәрес 15 минутлык тәнәфес белән чиратлаштырыла. Шул рәвешле санитар- эпидемиологик таләпләрне дә күз уңында тотарга тырышабыз.

   Чыгарылыш сыйныф укучыларыннан аеруча зур җаваплылык сорала, алар белән имтиханнарга әзерлек эшләре дәвам итә, консультацияләр оештырыла.

   Җыеп әйткәндә,өйдә торып уку балаларга фән нигезләрен үзләштерергә комачау итмәс дигән ышанычта калабыз.