Белем көне уңаеннан укучы балаларның, укытучыларның һәм әти-әниләрнең шатлыкларын уртаклашу ниятеннән мәктәбебезгә бик күп кунаклар килде. Алар арасында Татарстан Республикасы Дәүләт Советы депутаты Рәхмәтуллин Рауиль Шәйдәүләт улы да бар иде. Ул укучыларны, авыл халкын  бәйрәм белән котлады, яңа уку елына уңышлар теләде. Үз чыгышында хөрмәтле кунагыбыз Татарстанда, аерым алганда Арча районында мәгариф өлкәсенә зур игътибар бирелүе, ирешелгән уңышлар турында сөйләде. Республикабызда ел саен заман таләпләрен күздә тотып төзелгән яңа мәктәпләр, балалар бакчалары сафка баса, аерым программа нигезендә мәктәпләргә капиталь ремонт ясала. Мәгариф өлкәсе хөкүмәтебез, шулай ук республикабыз җитәкчесенең даими игътибар үзәгендә.

   Депутат кунагыбыз  туган телебезне – татар телен өйрәнү, аны белү, туган телдә аралашу мәсьәләсенә дә тукталды. Туган телен әйбәт белгән балага башка телләр, башка фәннәр дә җиңелдәнрәк бирелә. Барыбыз да туган телебезнең киләчәге өчен көрәшергә тиешбез. Моны әти-әниләргә дә яхшылап төшендерергә, аңлату эшләре алып барырга кирәк.

   Быелгы уку елында 7 бала мәктәп бусагасын тәүге тапкыр атлап керә.Әлбәттә, теләкләрнең иң матурлары алар адресына әйтелде.