22 нче апрель көнне “Казан арты” этнографик музеенда районыбызның китап сөючеләре өчен бик эчтәлекле чара оештырылды :  укытучы,танылган журналист,тәрҗемәче, гомеренең  19 елдан артык чорын район газетасы редакциясендә хезмәт итүгә багышлаган каләм иясе, гади ,туры сүзле, ярдәмчел Римма ханым Надршинаның «Берёза белая-подруга верная « исемле китабы тәкъдим ителде. Әлеге җыентыкка авторның төрле елларда  республикабызда чыккан газета- журналларда басылган язмалары, повестьлары, хикәяләре урын алган.

Кичәдә Римма Никита кызының тормыш юлы белән бәйле мәгълүматлар да яңгырады. Ул Сахалинда туа, бала чагы районыбызның Яңа Сала авылында үтә. Язучылык таланты, автор үзе билгеләп үткәнчә, нәкъ менә шушы авыл чишмәләреннән, табигатеннән килә. Чарада Римма ханымның чордашлары, хезмәттәшләре, укучылары, балалары чыгыш ясады. Барысы да авторга әлеге китабы белән сөендергәне өчен рәхмәт сүзләре әйттеләр, саулык-сәламәтлек, иҗади дәрт, киләчәк әле тагын матур әсәрләр иҗат итүен, яңа китаплар чыгаруын теләделәр. Зал тутырып килгән тамашачы әлеге чарадан тирән канәгатьлек хисләре белән таралды.