Мәктәптә Бөек Җиңүнең 67 еллыгына багышланган макетлар күргәзмәсе оештырылды. Барлык класс укучылары да актив катнашты.

7 нче май көнне Бөек Җиңүнең 67 еллыгына багышланган митингта Сөләй төп гомуми белем бирү мәктәбе укытучылары һәм укучылары да катнашты. Мәктәп укучылары сугыш ветераннары, тыл батырлары һәм авылдашлар белән берлектә Ана һәйкәленә чәчәк бәйләмәсе куйдылар. Сугыш кырында үз илләре өчен аяусыз көрәшеп һәлак булган авылдашларны бер минут тынлык белән искә алдылар.

Җиңү көненә багышлап Сөләй мәдәният йортында  сугыш ветераннары, тыл батырлары, авылдашлар өчен бәйрәм концерты оештырылды. Мәктәп укытучылары, укучылары да бу чыгышта актив катнаштылар. Сугыш темасына багышланган җырлар  җырладылар, сәхнә әсәрләреннән өзек куйдылар.

5 нче май көнне безнең мәктәптә "Казан утлары"  журналы редакциясе хезмәткәрләре  кунакта булды. Алмаз Гыймадиев укучыларны "Казан утлары" журналы редакциясе эшчәнлеге белән таныштырды. Алмаз Хәмзин һәм Алия Хәмзина үзләренең бай эчтәлекле чыгышлары белән укытучылар һәм укучылар күңелен яуладылар. Килгән кунаклар һәр укучыга "Казан утлары" журналы бүләк иттеләр.

Тулы фоторепортаж медиатека бүлегендә.

"Ир - егетләр китә армиягә". Мәктәптә тарих атналыгы ахырына якынлаша. Атналыкның  кульминацион  ноктасы - 9 нчы сыйныф укучыларының чыгышы булды. Алар "Ир-егетләр китә армиягә" дип аталган әдәби-музыкаль күренеш күрсәттеләр. Бөек Җиңүнең 67 еллыгы уңаеннан оештырылган бу күренеш  үткән белән бүгенгенең  бәйләнешен чагылдырды, сугыш һәм армия темасын яктыртты. 9 нчы сыйныф укучыларының чыгышын зал тын калып, яшьле күзләр белән карады.

"Музей" түгәрәге әгъзалары мәктәп укучылары, киогән кунаклар өчен мәктәпнең туган якны өйрәнү музеена да экскурсияләр оештыралар. Бөек Җиңү  бәйрәме алдыннан авылыбызның тыл батырлары, сугыш чоры балалары музейда кунакта  булдылар. Иске хатирәләрен яңарттылар, бала чакларын, яшь чакларын искә алдылар. Оештырылган  экскурсиядән бик канәгать калып,  музей җитәкчесе Гатауллина Гөлнара Әнвәр кызына һәм укучыларга рәхмәт әйтеп таралыштылар.

Бүген безне 7 нче сыйныф укучылары XVIII гасырга алып кайтты. XVIII гасыр - Россия тарихында вакыйгаларга, күренекле шәхесләргә бай чор ул. 7 нче сыйныф укучылары  "Самый умный" дигән интеллектуаль  ярышты катнаштылар. Алар 60 тан артык сорауга җавап бирделәр. Җиңүчеләр: Нуретдинова Лилия, Валиахметов Булат.

1812-2012. Быел Ватан сугышында  Россиянең җиңүенә 200 ел тулды. Шул уңайдан безнең мәктәптә 8 нче сыйныф укучылары катнашында  викторина үткәрелде. 8 нче сыйныф ике командага - "Кутузов армиясенә" һәм "Багратион армиясенә"  бүленеп  көч сынаштылар. Сораулар катлаулы, логик фикерләүгә нигезләнгән иде. 8 нче сыйныф укучыларының кызыксынып сорауларга  җавап эзләүләре, фикер алышулары һәм төгәл җавап бирүләре укучылар һәм укытучылар коллективын таң калдырды.

Безнең мәктәптә тарих атналыгы дәвам итә. Бүген безнең 6 нчы сыйныф укучылары Пионериянең 90 еллыгы хөрмәтенә пионер сборын сәхнәләштереп күрсәттеләр. Укучылар пионериянең тарихы белән таныштылар, пионерларның традицияләре  һәм данлы эшләре турында белделәр.

Мәктәпнең химия - биология укытучысы Ихсанова Гөлназ Әкрәм кызы үзе булган "Артек" пионер лагере турында сөйләде.

Тулы фоторепортаж медиатека бүлегендә.

"Син тарихны беләсеңме?"

Бүген мәктәптә башлангыч сыйныф укучылары арасында "Син тарихны беләсеңме?" дип аталган  интеллектуаль уен оештырылды. Уенда "Сөләйман  варислары" командасы һәм "Йолдыз" командасы көч сынашты. Укучылар үзләренең белемнәрен күрсәттеләр, бердәм, дус булдылар. Нәтиҗә дә шатландырды: дуслык җиңде! Афәрин!