27 февраль көнне гимназиябездә 9Б сыйныф укучылары белән Татарстан Республикасында игълан ителгән хәрби һәм хезмәт батырлыгы елына багышланган Парламент дәресе булып узды. 

Дәреснең төп темасы эшлекле патриотизм булды. Дәреснең кунагы һәм баш спикеры булып 4 нче Интернациональ бер мандатлы сайлау округы буенча Әлмәт шәһәр Советы депутаты, гимназиябезнең директоры Ильшат Ильдус улы Яруллин катнашты. 

Очрашуның төп идеясе - «Патриотизм: сүздән эшкә!» укучыларга гражданлык җаваплылыгына яңача карарга мөмкинлек бирде. Дәрес барышында туган илгә мәхәббәтнең үз вазифаларыңа җаваплы караудан башлануына басым ясалды. 

Бүген патриот булу – матур сүзләр сөйләү генә түгел, ә укуда, иҗатта һәм спортта уңышларга ирешү, җәмгыятькә файда китерү дигән сүз. 

Дәрестә балалар уңышлары белән горурланып уртаклаштылар. Нургалиев Фаяз триатлондагы уңышлары турында сөйләде, Сәлимгәрәева Лия - физкультура буенча Бөтенроссия олимпиадасының республика этабында җиңүе белән уртаклашты, Мифтахова Риана музыка мәктәбендәге уңышларын сөйләде, Иванова Софья инглиз телен өйрәнүдәге уңышлары белән бүлеште. Бүген ирешкән кечкенә җиңүләр иртәгә илебезнең зур данына әверелә.

Депутат белән укучылар арасында чын мәгънәсендә җанлы һәм ышанычлы диалог урнашты. Катнашучылар Ватанга мәхәббәт, гражданлык бурычы һәм намус дигән фундаменталь төшенчәләр турында фикер алыштылар. Ильшат Ильдусович хәзерге заман гражданинының сыйфатлары турында фикерләре белән бүлеште, укучыларга үзенең киңәшләрен бирде.   

Әңгәмә кызыклы булганга, дәрес сизелмичә дә үтеп китте. Без укыйбыз, өйрәнәбез, иҗат итәбез һәм җиңәбез, чөнки үз илебезне яратуыбызны сүздә түгел, ә эштә күрсәтәбез!