7 апрель көнне Елховой урта гомуми белем бирү мәктәбендә “Әхлаклы бала – тәрбиянең максаты” дип исемләнгән төбәкара фәнни – гамәли конференция үтте. Конференция эшендә галимнәр, дин әһәлләре, мәгариф идарәсе җитәкчеләре, балалар бакчасы мөдирләре, укытучылар һәм тәрбиячеләр катнашты. Көн укучыларның сәламләү концерты һәм мәктәп директоры Мостафина Ләйсән Хәлил кызының  “Мәктәптә әдәп - әхлак тәрбиясе. Үткәннәргә нәтиҗә, киләчәккә бурычлар” темасына чыгышы белән башланып китте. Аннан кунаклар төркемнәргә бүленеп ачык дәресләр карады. Дәрҗеманова Миләүшә Фатых кызы 3 сыйныфта “Балачак рәхәте – өлкәннәр канаты астында” темасына әдәби уку дәресе, 6 сыныфта Фәсхетдинов Искәндәр Мәхмүт улы “Сөйдергән дә тел, биздергән дә тел” темасына әдәп - әхлак тәрбиясе дәресе, 9 сыйныфта Мозафарова Лилия Замир кызы “К.Насыйри иҗатында әдәп - әхлак темасы” ына әдәбият дәресе, 11 сыйныфта Шәйхелова Халидә Габдрахман кызы “Г.Сәгыйров иҗатында яшәү мәгънәсе” дигән сыйныфтан тыш уку дәресләре уздырдылар. Галиева Фирая Әхмәт кызы оештырган “Әхлак бишеге – иманлы гаиләдә” исемле сыйныфтан тыш чара да беркемне дә битараф калдырмады. Конференциянең пленар өлешендә мәгариф идарәсе җитәкчесенең милли мәсьәләләр буенча урынбасары Җиһаншина Сиринә Максуд кызы, Елховой авыл җирлеге башлыгы Хәйрисламова Дания Рәҗәп кызы, Әлмәт районы имам – мөхтәсибе Фәһим хәзрәт Әхмәтҗанов, Татарстан Республикасы Баш казые Җәлил хәзрәт Фазлыев, тарих фәннәре докторы Фәйзелхак Ислаев, “Мәгариф” журналының бүлек мөхәррире Таһир Сабирҗанов, “Ак калфак” иҗтимгый оешмасының бүлек җитәкчесе Ландыш Зариповаларның чыгышлары булды. Мәктәпнең укыту – тәрбия эшләре буенча директор урынбасары Сафина Ләйсән Нуриман кызы үзенең чыгышында әдәп – әхлак тәрбиясе буенча алып барылган эшчәнлеккә тукталды. Кунаклар Елховой авылы беренче мәхәлләсенең Ярулла хаҗи исемендәге мәчете, аның янәшәсендәге мәдрәсә, балалар бакчасы, музей эшчәнлеге белән дә таныштылар. Конференция ахырында резолюция кабул ителде.