Без  татарча сөйләшәбез!
         Татар  телен киң  даирәдә  куллану мөмкинлекләрен ачу  максатыннан,  республика  күләмендә  ничәнче  ел  рәттән  “ Мин  татарча  сөйләшәм! “  бәйгесе  үткәрелә. 
        Бәйге  20  нче  марттан  15  нче  апрельгә  кадәр  Татарстан  җирлегендә оештырыла.  Бәйге  -  акциядә  мәктәпләр  генә  түгел,  ПТУ лар,  югары  уку  йортлары  да  катнашырга  мөмкин.
       Акциядә  мөмкин  кадәр  күбрәк  кеше  катнашырга,  татарча  аралашырга,  шулай  итеп,  телнең  үсешенә  үзеннән  өлеш  кертергә  тиеш.  Акция  барышында  укучыларыбыз  төрле  оешмаларда  булып,  яшьләрнең,  урта  буын  кешеләренең  татар  теленә  мөнәсәбәтләре  белән  кызыксындылар.
          Мәктәбебездә  үткәрелә  торган  “ Мин  татарча  сөйләшәм!”  акциясенең  бер  көнен  без  Казан  шәһәренә  сәяхәт белән  дәвам  иттердек.  2012  нче  ел – Россия  тарихы  елы   дип  игълан  ителгәнгә  күрә,  иң  беренче  булып  Татарстан  Дәүләт  музеенда  булдык.  Экскурсоводлар белән  татарча  аралашып,  үткәнебез  турында  шактый  күп  кызыклы  мәгълүматлар  алдык.  Сәфәребезне  Кремльдә  дәвам  иттек.  Анда  үзебез  кебек  үк экскурсиягә  чит  төбәкләрдән  килгән  кешеләр  белән  татарча  аралашып,  республикабыз  һәм  Казан  турында  сораулар  бирдек.  Башка  мәктәпләрдән  килгән  яшьтәшләребез  белән  татар  теленең  аралашу чарасы буларак  кулланылышы турындагы  әңгәмәләр  ике   як  өчен  дә  кызыклы  булды.  Сәфәребезне “Мега”  да  дәвам  итеп  андагы  шәһәр  халкы  һәм  килгән  кунаклар  белән  аралаштык.
         Туган  телен  чын  мәгънәсендә  хөрмәт  иткән  милләттәшләребез  дә  бу  акциягә  кушылдылар,  татар  теленең  язмышына  битараф  калмадылар.  Сәфәребез  бик  күңелле  һәм  файдалы  үтте.
        Форсаттан  файдаланып,  автобус  белән  ярдәм  иткәннәре  өчен  районның  мәгариф  бүлеге  җитәкчесе  А.Р.  Хәлиуллинга,    мәктәбебез  директоры  Л.З. Абдрахмановага  зур  рәхмәтебезне  белдерәбез.

                                                                Әлки  районы  Базарлы Матак  урта                                          
                                                                 гомуми  белем  мәктәбенең  татар  теле                
                                                                 һәм  әдәбияты  укытучылары  Г.Х.               
                                                                 Гатауллина,  Л.Ә.  Гарипова.

                                          “Мин  татарча  сөйләшәм !”  акциясе  кысаларында  “сайлаулар”.
            Татар  теле  дә,  рус  теле  дә  республикабызда  дәүләт  телләре  булып  санала.
              Безнең  мәктәбебез  рус  мәктәбе  булса  да,  бәйрәмнәр  һәм  кичәләр  ике  телдә  дә  күңелле  һәм  мавыктыргыч  булып  үтәләр.  Бигрәк  тә  рус  һәм  татар  халкының  гореф – гадәтләренә  багышланган  бәйрәм –кичәләр,  конкурслар  кызыклы,  истә  калырлык итеп  уздырыла.  Татар  һәм  рус  шагыйрьләренең,  язучыларының  юбилейларын  билгеләп  үтәбез.  Бигрәк  тә  Габдулла  Тукай,  Муса  Җәлил,  А.С. Пушкин,  М.Ю. Лермонтов,  Л.Н. Толстой  иҗатлары  якын  безгә.
           Якташларыбыз  турында  да  татарча  материаллар  туплана,  аларның  тормыш – юлларына  багышлап  кичә - конкурслар  үткәрелә,  газеталар  чыгарыла,  альбом – буклетлар  эшләнә,  аларга  багышлап  дәресләр,  сыйныф  сәгатьләре,  сыйныфтан  тыш  чаралар  уздырыла  бездә.
             Базарлы Матак  урта  гомуми  белем  мәктәбендә  “ Мин  татарча  сөйләшәм! “  акциясе  дәвам  итә.  Чара  кысаларында  8  нче  сыйныф  укучылары  5-7  нче  сыйныфлар  арасында  сайлаулар  үткәрделәр.  Ул чын сайлаулардагыча  оештырылган  иде.  Бюллетеньнәр,  сайлау  комиссиясе,  тавыш  бирү  өчен  кабина,  урно.  Бюллетеньнәрдә  “Син  татар телен  көндәлек  аралашуда кулланасыңмы?”  дигән  сорауга  “әйе”,  “юк”,  “өлешчә”  дигән  җаваплар  бирергә кирәк  иде.  Сораштыруның сайлаулар  формасында  үтүе  укучыларга  бик  ошады.  Соңыннан  “сайлау  комиссиясе”  тарафыннан  нәтиҗәләр  чыгарылды.  Рус  телле  укучыларның  күпчелеге  “Син  татар телен  көндәлек  аралашуда кулланасыңмы?”  дигән  сорауга  “әйе”  дип  җавап  биргән.


                                                                Әлки  районы  Базарлы Матак  урта                                          
                                                                 гомуми  белем  мәктәбенең  8 нче                           
                                                                 сыйныф  укучылары  Акопян  К,       
                                                                 Борисова  К.