Бер күрешү-үзе бер гомер бит,
Очрашуга сәбәп табылсын.
Бер-берләрен сагынышкан дуслар
Күрешергә монда агылсын!

      Нәкъ шундый максат белән  5 нче февраль көнне мәктәбебездә  “Акыл- тезген, белем-ат, тезгенеңне белеп тарт” исеме астында студентлар белән очрашу кичәсе уздырылды. Кичәдә үзебезнең мәктәпне тәмамлап, хәзерге  көндә югары уку йортларында укыган студентлар һәм 7-9 сыйныф укучылары катнашты. Студентлар безгә, укучыларга, үзләренең уку йортлары , студент тормышы, әлбәттә, үзләренең булачак һөнәрләре турында да тәфсилләп сөйләделәр. Аларның сүзләреннән күренгәнчә, студент кеше уку йортына керү имтиханнарыннан, зур көч куеп укудан тыш башка бик күп төрле кыенлыклар аша да уза икән. Беренчеләрдән булып әти-әнидән  аерылып, туган йортыннан чыгып китү тора. Аннан уку йортына кергәч, торак мәсьәләсен чишәсе дә була икән.  Кунакка килгән студентларыбыз мәктәпне тәмамлаганнан соң тапшырыла торган бердәм дәүләт имтиханнары балларының абитуриент өчен зур һәм мөһим икәнлеген кисәттеләр.

   Эйе, озак та узмас, безнең каршыда да “Кем булырга” дигән сорау басыр һәм безгә һөнәр  сайларга туры килер. Кичә барышында мин булачак һөнәреңне сайлау бик тә җаваплы һәм җитди эш икәнен аңладым.  Кичә төрле уеннар, җырларга үрелеп барды.  “Үз уен” исемле интеллектуаль уен барышында укучылар һәм студентларның төрле фән өлкәсендәге белемнәре тикшерелде. Әлбәттә, ике  төркем дә сынатмады.

     Бәйрәмебез ничек кенә күңелле булмасын, ул ахырына да якынлашты. Аның ахырында мәктәп укучылары төрле уку йортларына керү тәртибе, имтихан төрләре турында мәгълүматлар тупланган күргәзмә белән таныштылар. Мәктәп исеменнән тапшырылган истәлек бүләкләре дә кунакларыбыз күңеленә бик хуш килде. Кичәбезнең икенче өлеше чәй табыны артында, кызыклы әңгәмәләргә үрелеп дәвам итте.

    Барлык студентларыбызга укуларында уңышлар, тел ачкычы, сайлаган һөнәрләре буенча яхшы гына укуларын тәмамлап, туган якларыбызга эшкә кайтуларын теләп калабыз.

Кайтыйк әле, онытмыйк без, дуслар
Канат ярган туган ояны.
Кыңгыраулар чыңы дәшсен кабат,
Мәктәпкә дип килдек без тагын.