22-27 октябрь көннәрендә республиканың барлык район мәктәпләрендә дә “Парламент дәресләре” үткәрелде. Безнең мәктәптә дә бу  дәресләр оешкан төстә узды. Парламент дәресләре үткәрүнең максаты — балаларны парта артында утырган чакларында ук закон чыгару, аларны ничек кабул итү белән таныштыру.

     Нәкъ менә шул максаттан тарих һәм җәмгыять белеме укытучысы Н.Ф.Гимазов  5-9 сыйныф укучыларына Россия Федерациясенең парламенты турында тирән эчтәлекле мәгълүмат бирде. Аннан соң, укучылар закон чыгару процессы һәм кайбер законнарның тормышчанлыгы буенча үз фикерләрен җиткерделәр, бәхәсләштеләр.        

     Сыйныф сәгатьләрендә укучылар ил һәм республиканың дәүләт структуралары, законнар кабул итү механизмы, принциплары белән якыннан таныша алдылар.  “Парламент дәресләре»  яшь буынны хокукый нормалар белән таныштыру, аларда актив гражданлык позициясе тәрбияләү чарасына әверелде.

    Ә башлангыч сыйныф укучылары өчен исә сәяси сәгать балаларга аңлаешлы итеп, рәсемнәр һәм презентацияләр ярдәмендә үткәрелде. Әйе, бу чара бик файдалы һәм  мөһим, чөнки алар аша укучылар сәяси тормышка якыная, сәяси грамоталылыкларын арттыралар.