Якташыбыз Вахит Имамовка Татарстан республикасы халык язучысы исеме бирелде. Язучы, публицист Вахит Имамов 1954 елның 18 мартын-да Татарстанның Актаныш районы Иске Байсар авылында колхозчы гаиләсендә туган. 1971 елда туган авылында урта мәктәпне тәмамлаганнан соң, Казанга килеп, моторлар төзү берләшмәсендә металл кырдыручы (токарь) булып эшли башлый. 1973 елда Казан дәүләт университетының журналистика факультетына укырга керә. 1975 елның гыйнварыннан читтән торып уку бүлегенә күчеп, Татарстанның Балык Бистәсе районы газетасында әдәби хезмәткәр вазыйфаларын башкара. 1975—1977 елларда гаскәри хезмәттә булып кайтканнан соң, янә Балык Бистәсе район газетасында журналистлык эшен дәвам иттерә, газета редакциясенең хатлар бүлеген җитәкли. 1982 елда Вахит Имамов, Чаллы шәһәренә күчеп, гаиләсе белән шунда төпләнә. Төрле эшләрдә эшли: ике ел мәктәптә тарих фәнен укыта, КамАЗның пресс-рам заводында биш ел буена мастер, участок башлыгы, өлкән диспетчер вазифаларын башкара. 1990 елдан исә, КамАЗ типографиясе базасында Газета-китап нәшрияты оештырып, 2005 елга кадәр шуның баш мөхәррире булып эшли. Бер үк вакытта, 1997 елның языннан 2016 елга хәтле, ул Чаллы Язучылар оешмасын җитәкли. 2005 елда  Чаллыда чыгучы «Мәйдан» журналының баш мөхәрире.

Бүгенге көндә «Мәдәни җомга» газетасы баш мөхәрире.

Бүләкләре:

• Татарстанның атказанган мәдәният хезмәткәре
• 1995 ― Гаяз Исхакый премиясе
• 2014 ― «Утлы дала» исемле ике томлы тарихи романы өчен Габдулла Тукай исемендәге Татарстан Дәүләт премиясенә лаек дип табылды.
• 2022 ― Илдар Юзеев премиясе
• 2024 ― «Татар милләтенә күрсәткән олуг хезмәтләре өчен» халыкара медале (Бөтендөнья татар конгрессы)