Педагогия фәннәре кандидаты, Казан федераль университетының Филология һәм мәдәниятара коммуникацияләр институтының  гомуми тел белеме һәм төрки гыйлем кафедрасы доценты Фәтхуллова Кадрия Сөнгат кызы  1959 елның 18 октябрендә Актаныш районы Актаныш авылында туган. 1977 елда Актаныш урта мәктәбен тәмамлагач,  Казан дәүләт педагогия институтының  чит телләр факультетына укырга керә. 1982 елда институтны  кызыл диплом белән тәмамлый һәм Казан шәһәренең 78 нче мәктәбенә француз теле укытучысы итеп җибәрелә. 1992-1994 елларда КДПИның татар тел белеме кафедрасы каршындагы аспирантурада укый. 1996 елдан Казан университетында эшли. 2002 елда татар телендщ аралашырга  өйрәтү проблемасы буенча кандидатлык диссертациясе яклый.  Хәзерге вакытта ул КФУның Габдулла Тукай исемендәге Югары Милли мәдәният һәм мәгариф мәктәбенең әйдәп баручы укытучысы булып тора. Ул лекцияләр укый һәм практик дәресләр алып бара.

      Кадрия Фәтхуллова 200 дән артык фәнни — методик хезмәтләр авторы. "АНА ТЕЛЕ" онлайн-укыту мәктәбе үзәген  җитәкләде.

       Тынгысыз якташыбыз КАДРИЯ СӨНГАТЬ КЫЗЫ ФӘТХУЛЛОВА  Россия Федерациясе югары белем бирү системасының мактаулы хезмәткәре, Татарстанның атказанган укытучысы,  Каюм Насыйри исемендәге Республика премиясе лауреаты исеменә лаек булды;  “Мәгариф өлкәсендәге казанышлары өчен” күкрәк билгесе,  “Татар милләтенә күрсәткән хезмәтләр өчен” “Бөтендөнья татар конгрессы” халыкара Берлеге медале белән бүләкләнде.