15 нче февраль –Ватаннан читтә хәрби бурычларын үтәгән солдатларыбызны искә алу көне.Бу истәлекле датаны һәркем белә.1989 елның 15 нче февралендә ун сәгать утыз минутта 40-нчы армия командующие генерал-лейтенант Борис Громов Совет гаскәрләренең чикләнгән контингенты сугышчыларының соңгысы булып,СССР һәм Әфганстанны бүлешкән Аму-Дарья аша күперне кичә.

 Актаныш районыннан Әфган сугышында 127 егет катнаша, шуларның алтысының гомере әфган җирендә өзелә. Туган якка кайткач тыныч тормышта да без аларны югалта барабыз. Ут эчендә көрәшү, иңгә-иң куеп батырларча ил мәнфәгатьләрен яклаган якын дусларны югалту ачысы үзенекен итә.

Бу көннәрдә районыбызда яшәүче Әфган сугышы ветераннары белән очрашулар уза. Алар елларны артка чикереп кабат кайнар ноктада кичергәннәрен хәтерләрендә яңарта.

Актаныш балалар иҗат үзәгендә төрле түгәрәкләрдә шөгыльләнүче балалар белән бу көннәрдә тематик занятиелар үтә.Балалар хәрбиләребезнең фидакарьлеге,батырлыгы,дуслыгы турында йотлыгып тыңлыйлар. Рәсем сәнгатен яратучы балаларның эшеннән күргәзмә оештырылды.

Ватан ул-син, әти-әниең, туганнарың, торган җирең, елга-күлләрең, чишмәләрең, җиләкле болыннарың.Барыбызга да Җирдә Тынычлык кирәк!