Һөнәри бәйрәмнәре уңаеннан Актаныш укытучылары тарихларын барлады. Педагогларның югары дәрәҗәдә оештырылган әлеге хезмәт нәтиҗәсе белән район башлыгы Э.Н.Фәттахов һәм Россия Дәүләт Думасы депутаты Ә.Г.Когогина танышты. Халыкара укытучылар көне уңаеннан, Актаныш районы мәгариф хезмәткәрләренә чиксез хөрмәт һәм рәхмәт сүзләре 4 октябрь көнне үк ирештерелде. Быел районыбыз мәктәпләрендәге мөгаллимнәр үзләренең һөнәри бәйрәмнәренә мәктәп тарихларын барлап, баннерлар ярдәмендә фотобәйгедә катнаштылар. Белем бирү йортларын төрле чорларда җитәкләгән бөек шәхесләрне чагылдырган баннерлар бәйрәмнең яменә әверелде. Фойеда урнашкан күргәзмәдә шулай ук мәдрәсәдән алып XXI гасырга кадәр булган уку-укыту системасы да бик эзлекле чагылдырылган иде. Әлеге укытучылар көненә багышланган фотобәйгедә Яңа Әлем төп гомуми белем бирү мәктәбе Гран-При яулады һәм диплом белән бүләкләнде.

Фотобәйге үз эченә түбәндәгеләрне алды:

1.Авылда беренче мәгърифәтчеләр.

2.Революция елларында укытучылар.

3.Сугыш чорында һәм сугыштан соң елларда укытучылар.

4.Хәзерге заман мөгаллимнәре.