14 гыйнвар көнне Актанышның “Бүләк” өстәмә белем бирү үзәгендә Татарстан Президенты тарафыннан оештырылган Яшь гражданнар форумы үтте. Аның максаты – балаларның иҗтимагый яктан активлыгын арттыру. Бу чарада безнең мәктәптән 9 нчы класс укучылары Мотавалова Әлфия һәм Хамзина Наилә катнашты. Монда алар башка форумчылар белән бергә балалар һәм яшьләрне борчыган сорауларга җавап эзләделәр, проектлар төзеп, үзләренең тәкъдимнәрен әйттеләр. "Урманнарга чүп салу өчен урналар куярга тәкъдим итәм! Балалар һәм яшүсмерләргә авыр вакытта мөрәҗәгать итү өчен юрист, психолог һәм башка кирәкле белгечләр төркеме булсын иде!  Безгә патриотик темадагы кинофильмнар күрсәтелсен. Һәр татар баласы үз тарихын, гореф-гадәтләрен, тарихны белсен!" - Әлеге фикерләрне район укучылары “Яшь гражданнар форумы”нда белдерде.

Актаныш муниципаль районы башлыгы Энгель Фәттахов “Яшь гражданнар форумы”ның пленар утырышында катнашты. Укучыларны, балалар оешмаларын, әйдәманнарны актив тормыш позициясе белән яшәргә чакырды. Форум бик бай эчтәлекле һәм файдалы узды.