Гөлзадә Әхтәмованың "Соңгы ветеран" шигыре ( Сагит Фассах улына багышлана) 

Гөлзадә Әхтәмова

Соңгы ветеран

(Исәнбай авылында Тютиев Сәгыйть)

Йөз кырыклап иде әле алар-

Яу кырыннан әйләнеп кайткан.

Фани дөньядан китеп бардылар шул.

Сәгыйть абый- соңгы могикан.

Яраларына дәва таба алмый

Интектеләр туган илдә дә.

Сугыш карчыгасы чүпли торды

Берәм- берәм тыныч көндә дә.

Кар өстендә яткан тәүлекләре

Гомер сәгатьләрен кыскартты.

Пуля тимәгәнгә- окоп салкыны тигән,

Җелегенә үткән- саргайтты.

Алып кебек таза ирләр иде,

Сугыш сындырды, бөкте, чирләтте.

Көч-хәл белән кайтып егылдылар

Азмысы соң сугыш беткәчтен...

Арадан берәү могҗизадай калган

Җитмеш елдан соң бүген авылда.

Онытылмас хәтер! Яшь буынга

Сөйлә, ветеран, сугыш турында!

Белеп калыйк- сөйлә, Сәгыйть абый!

Без күрмәгән сугыш көннәрен.

Сиңа түкми-чәчми сөйләр өчен

Ходай гомер биргән, мөгаен.

Җир белән күк аерылмаслык булган

Курск дугасында ничекләр?

Артиллерист, ничек исән калдың

Ярты Ауропаны кичепләр?

Будапештта Җиңү тантанасы!

Шундый бәхет- шатлык күңелгә!

Хат язасың сөенеп Татарстанга-

Исәнбайга- газиз әниеңә.

Язмыш сине Көнчыгышка дәшә,

Узып китеп туган авылыңны,

Борыласың японнарга каршы,

Үзгәртәлми барыр юлыңны.

Сөйлә, ветеран, сөйлә! Күкрәгеңдә

Чыңлый нинди орден-медальләр.

Күңелләрдә калсын тарих булып

Батырлыклар, сезнең күргәннәр.